மக்கா மாநகரில் அவதாரஞ் செய்தருளிய எம் பெருமானார் முஹம்மது முஸ்தபா ரஸுல் ஸல்லல்லாஹு அலைஹி வஸல்லம் அவர்களின் வமிச பாரம்பரிய மதனிலே; முப்பத்து மூன்றாம் அருந்தவத் தோன்றலாயும்; ஜீலான் மாநரில் பக்தாத் என்னும் திருப்பெயர் கொண்ட அருள் நகரில் ஆன்மீக ஆட்சி செய்த முஹ்யித்தீன் அப்துல் காதிர் ஜீலானிய் (ரலியல்லாஹு அன்ஹு) அவர்களின் வமிச பாரம்பரியத்தின் இருபதாம் தோன்றலாயும்; மாதா வழியில் ரஸுல் (ஸல்லல்லாஹு அலைஹி வஸல்லம்) அவர்களின் முப்பத்திரண்டாவது தோன்றலாயும்; முஹ்யித்தீன் ஆண்டவர்களிலிருந்து பத்தொன்பதாவது தோன்றலாயும்; தென்னிலங்கை திக்குவல்லை என்னும் ஊரில்; அருந்தவச் சீலர் ஆன்மீக குருநாதர்; ஜமாலிய்யா அஸ்ஸய்யித் யாஸீன் மௌலானா அல்ஹஸனிய்யுல் ஹுஸைனிய்யுல் ஹாஷிமிய் நாயகம் (ரலியல்லாஹு அன்ஹு) அவர்கள் அவதனித்தார்கள்.
ஜமாலிய்யா அஸ்ஸய்யித் யாஸீன் மௌலானா (ரலியல்லாஹு அன்ஹு) அவர்களின் தவமிகு தந்தையார்- ஆத்ம ஞானச்சுடர்; அல்ஆரிபுஸ் ஸமதானிய் அஷ்ஷெய்கு அஸ்ஸய்யித் முஹம்மத் மௌலானல் காதிரிய்யுல் ஹஸனிய்யுல் ஹாஷிமிய் நாயகம் அவர்கள் ஆவார்கள்.
அவர்கள் அபூயாஸீன் என்றும்; மௌலானல் ஜமாலிய் என்றும்; ஜமாலிய்யா மௌலானா என்றும் அன்புடன் அழைக்கப்பட்டார்கள். அவர்கள் ஜமாலிய்யா மௌலானா என்ற பெயர் கொண்டே பிரபலமானவர்கள்.
தாயார்
ஜமாலிய்யா அஸ்ஸய்யித் யாஸீன் மௌலானா நாயகம் அவர்களின் தாயார் அஸ்ஸய்யிதா உம்மு ஹபீபா கண்ணே ஆவார்கள். இவர்கள் இலங்கையின் தென்பகுதியில் உள்ள வெலிப்பிட்டி எனும் கிராமத்தில் பிறந்தார்கள். பின்னர் இவர்களின் தந்தையாரான அல்வலிய்யுல் அஷ்ஹர் அஸ்ஸய்யித் முஹம்மத் மௌலானா அவர்கள் வெலிப்பிட்டியில் மறைந்த போது தங்களின் தாயின் ஊரான இலங்கையின் தென்னகத்தேயுள்ள திக்குவல்லை யென்னும் ஊருக்கு குடியெர்ந்தார்கள். இவர்கள் காதிரிய்யாத் தரீக்காவையும்; ஷாபிஇய் மதுஹபையும் சேர்ந்தவர்கள்.
பாலியம்
ஜமாலிய்யா மெளலானா அவர்கள்- தங்கள் உறவு முறையில் மைத்துனியான அஸ்ஸய்யிதா உம்மு ஹபீபாக் கண்ணே அவர்களை ஹிஜ்ரி 1316 ரஜபு மாதம் பிறை 19 திங்கள் இரவு திருமணம் செய்தார்கள்.
இவர்களுக்கு பிள்ளைகள் இருவர் பிறந்தனர். மூத்த பிள்ளையே நாம் சரித்திரம் கூறும் ஜமாலிய்யா அஸ்ஸய்யித் யாஸீன் மௌலானா அல்ஹஸனிய்யுல் ஹுஸைனிய்யுல் ஹாஷிமிய் நாயகம் அவர்கள்.
குருகுலச் சிந்தை; அருங்கலை வித்தை; பெருந்தவத் தன்மை; உயர்நிலை; பொய்யாமை; வீரம்; அன்பு; அறம் ஆகிய எல்லா உயர் தன்மைகளையும் ஏந்திய நம் சரித்திர நாயகர்- சிறு வயதில் தங்கள் தாயின் அரவனைப்பிலேயே வாழ்ந்து வந்தார்கள். ஒழுக்க வழிமுறைகளையும்; திருக்குர்ஆன் திருத்தமாய் ஓதுதலையும்- தங்கள் தாயாரிடத்திலயே கற்றுத் தேர்ந்தார்கள்.
தங்கள் தந்தை நாயகமவர்கள் இலங்கை வந்து- தம் அருந்தவப் புதல்வரை பாரதம் அழைத்துச் சென்று கல்வி கற்பிக்க நாட்டம் கொண்டு தம் மனைவியாரிடத் தெடுத்தியம்பவே; தன் தவக் கொழுந்தை விட்டுப் பிரிய மனம் கொள்ளவில்லை என தாயார் தெரிவிக்கின்றார்கள். சினம் கொண்ட தந்தை நாயகம் உன் சகோதரர்களும்- நீயும் இறக்கக் கடவீர்கள் என் பிள்ளை என்னோடு வந்து சேர்ந்து கொள்ளும்- என்று கூறிப் பாரதஞ் சென்றார்கள்.
சிறிது காலம் செல்லவே- தம் அருமைத் தாயாரின் சகோதரர்கள் இருவரும் ஒருவர் பின் ஒருவராய் இறையடி சேர்ந்தார்கள். அவர்களைத் தொடர்ந்து அருமைத் தாயாரும் இறையடி சேர்ந்தார்கள். அப்போது ஜமாலிய்யா அஸ்ஸய்யித் யாஸீன் மௌலானா அல்ஹாஷிமிய் நாயகம் அவர்களுக்கு அகவை (வயது) பத்தாயிற்று. தம்மைக் கண்ணெனப் போற்றி வளர்த்த அன்புத் தாயாரையும்; ஆதரிப்போரையும்- இழந்த மௌலானா நாயகம் அவர்கள் பெருந்துயருற்றார்கள்
அக்காலத்தே வெலிகாமத்திலுள்ள புகாரிக்கலை நிலையிலும்; மாத்தறையில் ஒரு கலைக் கூடத்திலும்-குருகிய காலம் ஆரம்ப அறபுக் கல்வியைக் கற்றார்கள். தம் அருந்தவப் புதல்வரின் துயரை அறிந்திருந்த தந்தை நாயகம்- பிள்ளையை அழைத்தமையால்- 1911ஆம் ஆண்டு ஆகஸ்ட் மாதம் இருபதாம் திகதி பாரதஞ் சென்றார்கள். அப்போது இவர்களுக்கு வயது பதினொரு வருடங்களும்- ஏழு மாதங்களும் இருபத் தொரு நாட்களுமேயாம்.
வரலாற்று தொகுப்பு
ஹாஃபிழ் மௌலவி V.M. முஹம்மது ஜகரிய்யா யாஸீனிய் அவர்கள்
மௌலானா ஷெய்க் யாஸீன் ரஹ்மதுல்லாஹி அலைஹி
எழுதியவர் - ஹிஸாம் ஹிஜாஸ்
குத்புல் பரீத் ஜமாலிய்யா அஸ்ஸைய்யத் யாஸீன் மௌலானா (ரஹ்மதுல்லாஹி அலைஹி) அவர்கள் முஹம்மத் முஸ்தபா ஸல்லல்லாஹு அலைஹிவஸல்லாம் அவர்களின் முப்பத்து மூன்றாம் தலைமுறை வாரிசு! முஹியத்தீன் அப்துல் காதிர் ஜீலானி ரலியல்லாஹு அன்ஹு அவர்களின் இருபதாவது வழித்தோன்றல் வாரிசு ஆவார்கள்!
உயர்ந்த இறைநேசர்கள் அடையும் ஆன்மீக அனுபவமான உரூஜ் அனுபவத்தை வாழ்வில் பெற்ற இறைநேசர்.
அவர்களின் தந்தை ஓர் அவ்லியா ! கெளதுஸ்ஸமான் ! அவர்களின் மகனாரோ ஒரு குதுபுஸ்ஸமான் !
மெய்ஞான மேதை அப்துல் கரீம் ஜீலி (ரலியல்லாஹு அன்ஹு) அவர்களின் நூலுக்கு விரிவுரை எழுதியபோது அவர்களின் ஆன்மாவே "ஹாலிராகி" (பிரசன்னமாகி) விளக்கம் கூறும் வாய்ப்புப் பெற்றவர்கள்.
மேலும்
புஹாரி ஷரீபுக்கு விரிவுரை எழுதிய மேதை!
அரபு - அரபுத்தமிழ் அகராதி உருவாக்கிய பண்டிதர் !
அரபு, தமிழ், ஆங்கிலம், சிங்களம், உருது, மலையாளம், பார்ஸி எனப் பல மொழிகளிலும் பாண்டித்தியம் பெற்ற பன்மொழிப் புலவர்!
அரபியரும் வியக்கும் வகையில் அரபுமொழிப் புலமை பெற்ற நாடறிந்த நாவலர்!
ஆலிம்கள் போற்றும் அல்லாமா !
படித்தோர் விரும்பும் பல்கலைக்கழகம் !
முன்னாள் சிலோன் கவர்மண்ட் கல்வி இலாகா, அரபு பரீட்சை சபைத் தலைவர் (1951) !
முன்னாள் அகில இலங்கை உலமா சபை தலைவர்.!
"ஹக்கிய்யதுல் காதிரிய்யா "எனும் தரீக்காவின் நிருவனர்!
இத்தனை சிறப்புக்கும் சொந்தமான அந்த மாமேதைதான் "குத்புல் பரீத் ஜமாலிய்யா அஸ்ஸைய்யத் யாஸீன் மௌலானா நாயகம் (ரலியல்லாஹு அன்ஹு)" அவர்கள் ஆவார்கள்.
இவர்கள் இலங்கையில் தோன்றி தமிழகத்திலும் ,இலங்கையிலும் வாழ்ந்து , தஞ்சை மாவட்டம் சீர்காழிக்கு அருகேயுள்ள திருமுல்லை வாசல் எனும் ஊரில் அடக்கமாயுள்ளார்கள் .
இலங்கையின் முஸ்லிம் அறிஞர்களின் வாழ்க்கை வரலாற்றை எழுத முனைவோர் மாமேதை ஜமாலிய செய்யித் யாஸீன் மௌலமா (ரலியல்லாஹு அன்ஹு) அவர்களின் வாழ்க்கை பற்றி குறிப்பிடாமல் எழுதினால் அது இலங்கை அறிஞர்களின் முழு வரலாறாக நிறைவு பெறாது என்பதை அறிஞர் உலகம் நன்கு அறியும்.
துல் கஃதா பிறை 17 அன்னவர்களின் நினைவு தினமாகும்
Hide
